നെഗറ്റീവുകള്‍

തീകൊണ്ട്

നാം അമ്മയുടെ ചിത്രങ്ങള്‍

കോറിയിടുന്നു.

സഹനത്തിന്റെയടിക്കുറിപ്പ്

നേരത്തേ കൊടുക്കുന്നു.

അവിയലിന്റെ കഷണങ്ങള്‍

അച്ഛന്‍ പാകം.

ത്യാഗത്തിന്റെ തലക്കുറി

ടൈപ്പു ചെയ്ത് വെച്ചിരിക്കുന്നു.

എരിവെയിലില്‍

സ്നേഹസുരക്ഷകള്‍

പെയിന്റു ചെയ്തു കയറ്റുന്നു.

-എനിക്ക്

അച്ഛനേയുമമ്മയേയും

ഇഷ്ടപ്പെടേണ്ടതുണ്ട്.

കംപ്യൂട്ടര്‍ കൊണ്ട്

എന്റെ പ്രണയത്തിന്

വിപ്ലവത്തിന്റെ ലേ ഔട്ടും

നിറവും, മണവും കുത്തിവെയ്ക്കുന്നു.

-ഒരുവന്റെ പ്രണയം

അവനിഷ്ടപ്പെടേണ്ടതുണ്ട്.

കടലാകാശനീലിമകള്‍;

കാര്‍വര്‍ണ്ണന്റെ രാസലീല

പെങ്ങള്‍ ചാനല്‍ കാണുന്നു.

കണ്ണടയില്‍ ഞാനവളെ,

കുങ്കുമം, സാരിത്തലപ്പ്, പര്‍ദ്ദ, യെന്ന്

ചേരുംപടി പ്രോഗ്രാം ചെയ്തെടുക്കുന്നു.

ഇഷ്ടക്കാഴ്ചകള്‍ കാണേണ്ടതുണ്ടവള്‍,

ഇഷ്ടപ്പെടേണ്ടതുണ്ടെനിക്കുമവളെ

-പെങ്ങളെന്നോര്‍ക്കെ.

...2000...